जनकपुरधाम । छुरा प्रहार गरी आफ्नै ससुराको हत्या गरेका एक व्यक्तिलाई धनुषा प्रहरीले पक्राउ गरी सार्वजनिक गरेको छ । पक्राउ पर्नेमा जनकपुरधाम उपमहानगरपालिका २१ कुर्थाका ४८ वर्षीय बेचन महासेठ छन् । जनकनन्दनी गाउँपालिकाबाट उनलाई पक्राउ गरिएको धनुषाका प्रहरी प्रमुख एसपी नरहरि रेग्मीले जानकारी दिए ।
उनका अनुसार बेचनले आफ्नै ससुरा जनकपुरधाम १५ कुवारामपुरका ६५ वर्षीय बासुदेवप्रसाद साह ‘विमल’ को गत असार १८ मा हत्या गरेका थिए । घटनापछि उनी फरार भएका थिए ।
घरायसी विवाद तथा लेनदेनका कारण बेचनले ससुराको हत्या गरेको प्रारम्भिक अनुसन्धानले देखाएको छ । एसपी रेग्मीले बेचनमाथि कर्तव्य ज्यान मुद्दामा थप अनुसन्धान अगाडी बढाएको जानकारी दिए । मृतक बासुदेव जनकपुरधामका मेयर मनोज साहका काका हुन् ।
