जेनजी पुस्ताको प्रदर्शनका क्रममा प्रदर्शनकारीको मृत्यु भएपछि मन्त्रिपरिषदको आकस्मिक बैठक बस्ने भएको छ। प्रधानमन्त्रीको सरकारी निवास बालुवाटारमा सोमबार साँझ छ बजे बैठक बस्न लागेको हो।
जेनजी पुस्ताको प्रदर्शनका क्रममा दुईजनाको मृत्यु भएको पुष्टि भएको छ भने सयौं जना घाइते भएका छन्। घाइतेहरूको विभिन्न अस्पतालमा उपचार भइरहेको छ। प्रदर्शनमा तीनजना पत्रकारहरू समेत घाइते भएका छन्।
यसै विषयमा छलफल गर्न प्रधानमन्त्री केपी शर्मा ओली मन्त्रिपरिषदको आकस्मिक बैठक बोलाएका हुन्।सामाजिक सञ्जाल प्रतिबन्ध र भ्रष्टाचार विरुद्ध नयाँ पुस्ताका युवा (जेनजी)हरू सडक प्रदर्शनमा उत्रिएका छन् । उनीहरूले काठमाडौंसहित देशभर प्रदर्शन जारी राखेका छन्।
सरकारले समयसिमा तोकेर नेपालमा दर्ता हुन दिएको समयावधि सकिएपछि हाल बन्द गरिएका सामाजिक सञ्जालको सुचारु र भ्रष्टाचारको अन्त्यको माग गर्दै जेन जी पुस्ताका युवाहरूको समूहले काठमाडौंको माइतिघरदेखि बानेश्वर क्षेत्रमा प्रदर्शन गरेका हुन् ।
सोही क्रममा जेनजी पुस्ता र प्रहरीबिच झडप भएको छ। भीड नियन्त्रण लिन प्रहरीले अश्रुग्यास र पानीको फोहोरा हानेको छ। सुरक्षाकर्मीमाथि ढुंगामुढा र निषेधित क्षेत्र तोड्न खोजेपछि प्रहरीले अश्रुग्यास र रबरको गोली प्रहार गरेको हो।
