Wednesday, April 17, 2024
spot_img
Homeफिचरधोबिनीमा कमिशनको कारण कुटाकुट भएको खुलासा

धोबिनीमा कमिशनको कारण कुटाकुट भएको खुलासा

उनले वीरगंजमा समानान्तर कार्यालय सञ्चालन गरेर यहीबाट गापाका सबैजसो काम गर्दै आएका थिए ।

वीरगंज, २१ चैत/ धोबिनी गाउँपालिका कार्यालयमा हिजो मङ्गलवार प्रमुख प्रशासकीय अधिकृत र कार्यपालिका सदस्यबीच भएको झगडाले सो गापामा हुने गरेको अनियमिततालाई उजागर गरेको छ ।
धोबिनी गापामा हिजो भएको घटना बाहिरिएको मात्र हो, यस अघिदेखि सो पालिकामा प्रमुख प्रशासकीय अधिकृत र जनप्रतिनिधिहरूबीच मनमुटाव रहँदै आएको थियो ।
प्रमुख प्रशासकीय अधिकृत प्रमोदकुमार साह धोबिनीमा सरुवा भएर आएको सात महीनामा भएको छ । तर उनी यो अवधिमा मुश्किलले आधा महीना मात्र कार्यालयमा बसेका छन् । उनले वीरगंजमा समानान्तर कार्यालय सञ्चालन गरेर यहीबाट गापाका सबैजसो काम गर्दै आएका थिए ।
कार्यालयका लेखापाल र जिन्सी प्रमुखसँगको सहकार्यमा वीरगंजमा रहेको समानान्तर कार्यालयबाट गोप्य टेन्डर प्रकाशन गर्ने र त्यसमा लाखौंको अनियमितता गर्ने गरेको आरोप लागेको छ ।
गापाको वार्षिक आन्तरिक आम्दानी दुई करोड रुपैयाँ छ । गापामा स्थिति पोखरी ठेक्काबाट सोबापतको रकम गापालाई प्राप्त हुने र सोही रकम जनप्रतिनिधिहरूलाई बाइपास गरेर प्रमुख प्रशासकीय अधिकृतले आफूखुशी सञ्चालन गर्दा विवाद चुलिएको हो । यसअघि जनप्रतिनिधिहरूले आआफ्नो आवश्यकताका सामानहरू वडामार्फत खरीद गर्ने र त्यसको भुक्तानी पालिका कार्यालयबाट हुने चलन थियो । तर प्रमुख प्रशासकीय अधिकृत साहले सो कार्य बन्द गरी आफू मातहतबाट खरीद हुने व्यवस्था सिर्जना गरेका थिए । आफू मातहतबाट सामानहरू खरीद हुँदा वडा कार्यालयलाई प्राप्त हुने कमिशन मरेको र सबैजसो खरीदबाट प्रमुख प्रशासकीय अधिकृतलाई कमिशन जाँदा जनप्रतिनिधिहरू रिसाएका थिए ।
चालू आवमा पोखरीको ठेक्काबापत उठेको दुई करोड रुपैयाँमध्ये एक करोड सञ्चित थियो । प्रमुख प्रशासकीय अधिकृत साहले सो रकममध्ये ८० लाख खर्च गरिसकेका थिए र सोबापतको कमिशन पनि बुझेका थिए । प्रमुख प्रशासकीय अधिकृत साहले ८० लाखको सामान टेन्डर नगरी सहनी ब्रदर्स सप्लायर्ससँग सामान खरीद गरेको र सोबापत २० लाख कमिशन बुझेको आरोप छ । त्यसरी खरीद गरिएका सामानहरू उनले वडा कार्यालयमा पठाएर रातारात वितरण गरेको वडाध्यक्षहरूको आरोप छ ।
धोबिनी गापामा अध्यक्ष र उपाध्यक्षबीच तनाव छ । दुवै नमिलेका र बहुमत अध्यक्षतर्फ भएको कारण अध्यक्षलाई प्रभावित पारेर प्रमुख प्रशासकीय अधिकृतले यी सबै कारनामा रच्दा विवाद बढेको कर्मचारीहरू बताउँछन् ।
चालू आवमा विनियोजित बजेट सम्बन्धित शीर्षकमा खर्च नगरी प्रमुख प्रशासकीय अधिकृत साहले आफूखुशी खर्च गरेको जनप्रतिनिधिहरूको आरोप छ । रेडबूकमा अङ्कित योजनाविपरीत आफूखुशी खर्च गरेको भन्दै जनप्रतिनिधिहरू र प्रमुख प्रशासकीय अधिकृत साहबीच धेरै दिनदेखि विवाद रहँदै आएको छ । गापा कार्यालयमा नबसेर वीरगंजबाट काम सम्पन्न गर्दै आएका उनी हिजो कार्यालय पुग्दा पुरानो विषयलाई लिएर विवाद बढेको र हात हालाहालको अवस्था सिर्जना भएको थियो ।
अहिले सो गापाका ठेकेदारहरूले काम सम्पन्न गरेबापतको भुक्तानी पाएका छैनन् । यसैगरी, शिक्षकहरूले होलीमा पनि तलब पाएनन् । जनप्रतिनिधिहरूलाई थाहा नदिई जथाभावी सामान खरीद गर्दै आएका प्रमुख प्रशासकीय अधिकृत साहले यसबारेमा सम्बन्धित पक्षसँग संवाद, भेटघाट पनि नगरेका कारण हिजो कार्यपालिका सदस्य दिनेश कलवार जङ्गिएको बताइन्छ । Source :Prateekdaily.com

RELATED ARTICLES

Leave a Reply

- Advertisment -spot_img

Most Popular

Recent Comments

%d bloggers like this: